ചാവക്കാട്: ഗുരുവായൂർ നിയോജകമണ്ഡലത്തിൽ വിജയിച്ച എൽഡിഎഫ് സ്ഥാനാർത്ഥി എൻ.കെ അക്ബറിന് അഭിനന്ദനങ്ങളുമായി എതിർ സ്ഥാനാർത്ഥിയായി മത്സരിച്ച മുസ്ലിം ലീഗിലെ സി.എച്ച് റഷീദ്. ഫേസ്ബുക്കിലാണ് എനിക്ക് അക്ബറിന് അഭിനന്ദനങ്ങൾ അറിയിച്ച സി.എച്ച് റഷീദ് പോസ്റ്റിട്ടത്.
പോസ്റ്റിന്റെ പൂർണ്ണരൂപം
പ്രിയപ്പെട്ടവരേ,
ചില തോൽവികൾക്ക് വിജയത്തേക്കാൾ മധുരമുണ്ടാകും. നിങ്ങളെപ്പോലെ സ്നേഹമുള്ള മനുഷ്യർ കൂടെയുണ്ടെങ്കിൽ ആ തോൽവിക്കും ഒരു വലിയ അർത്ഥമുണ്ട്. അക്കങ്ങളിൽ ഒരുപക്ഷേ ഞങ്ങൾ പിന്നിലായിരിക്കാം, പക്ഷേ നിങ്ങൾ നൽകിയ ആ വലിയ സ്നേഹത്തിന് മുന്നിൽ ഞാൻ എന്നേ ജയിച്ചു കഴിഞ്ഞു.
പുന്നയൂർക്കുളത്തെയും വടക്കേക്കാട്ടെയും വഴികളിലൂടെ നടക്കുമ്പോൾ ലഭിച്ച സ്നേഹം… പുന്നയൂരിലും ചാവക്കാട്ടെയും തിരക്കുകൾക്കിടയിൽ കിട്ടിയ കൈകോർക്കലുകൾ… കടപ്പുറത്തിന്റെ കാറ്റിലും പൂക്കോട്ടെയും ഗുരുവായൂരിലെയും ഏങ്ങണ്ടിയൂരിലെയും ഓരോ വീട്ടുമുറ്റത്തും കണ്ട പ്രതീക്ഷ നിറഞ്ഞ മുഖങ്ങൾ… ഇതൊന്നും ഈ ജന്മത്തിൽ ഞാൻ മറക്കില്ല.
വിജയിച്ച ശ്രീ എൻ.കെ അക്ബറിന് ഹൃദയം നിറഞ്ഞ അഭിനന്ദനങ്ങൾ. നാടിന്റെ വികസനത്തിനായി മികച്ച രീതിയിൽ പ്രവർത്തിക്കാൻ താങ്കൾക്ക് കഴിയട്ടെ എന്ന് ആശംസിക്കുന്നു.
നമ്മൾ ജയിച്ചില്ലായിരിക്കാം… പക്ഷേ നമ്മൾ ഉയർത്തിയ ശബ്ദം വെറുതെയായില്ല എന്ന് ഈ കണക്കുകൾ പറയുന്നു. പതിനെട്ടായിരത്തിന്റെ വലിയ ഭൂരിപക്ഷത്തെ രണ്ടായിരത്തിന്റെ താഴെ എത്തിക്കാൻ കഴിഞ്ഞത് എന്റെ മിടുക്കല്ല, മാറ്റം ആഗ്രഹിച്ച നിങ്ങളുടെ വലിയ മനസ്സാണ്.
വികസനത്തിന്റെ വെളിച്ചം കാണാത്ത വഴികളെക്കുറിച്ച് നാം സംസാരിക്കാൻ തുടങ്ങിയിരിക്കുന്നു. ആ പോരാട്ടം ഇനിയും തുടരും.
കഴിഞ്ഞ കാലങ്ങളിൽ ഗുരുവായൂർ മണ്ഡലത്തിന്റെ ക്ഷേമത്തിനായി ശ്രമിച്ചിട്ടുണ്ട്, ഇനിയും അത് തുടരും.
എല്ലാത്തിൽ നിന്നും പാഠങ്ങൾ ഉൾക്കൊണ്ട് മുന്നോട്ടുപോകണം. അതുകൊണ്ട് തന്നെ ജനവിധിയെ ഞാൻ പൂർണ്ണമായി മാനിക്കുന്നു.
എന്റെ പ്രിയപ്പെട്ട ചാവക്കാട്, പുന്നയൂർക്കുളം, പുന്നയൂർ, കടപ്പുറം, ഒരുമനയൂർ,വടക്കേക്കാട്, പൂക്കോട്, ഗുരുവായൂർ, ഏങ്ങണ്ടിയൂർ… സ്നേഹത്തോടെ നിങ്ങൾ എന്നെ പൊതിഞ്ഞപ്പോൾ ഞാൻ ഒരേയൊരു ആഗ്രഹം മാത്രം കണ്ടു—നമ്മുടെ നാടിന് നല്ലൊരു മാറ്റം. ആ ലക്ഷ്യത്തിലേക്കുള്ള യാത്രയിൽ ഞാൻ തളരില്ല; ഈ മണ്ണിൽ നിങ്ങളോടൊപ്പം എന്നും ഞാനുണ്ടാകും.
സ്നേഹപൂർവ്വം തോൽക്കുന്നു…
അതിലും വലിയ സ്നേഹത്തോടെ നിങ്ങളെ ഓരോരുത്തരെയും ഹൃദയത്തോട് ചേർത്തുപിടിക്കുന്നു.
നന്ദി…
എന്നും സ്നേഹം മാത്രം
സി എച്ച് റഷീദ്
