കൊച്ചി: പോളണ്ടില് ജോലി വാഗ്ദാനം ചെയ്തു വയനാട് സ്വദേശികളില്നിന്നു മൂന്ന് ലക്ഷം രൂപ തട്ടിയ കേസില് തൃശൂര് സ്വദേശിയെ തലപ്പുഴ പൊലീസ് പിടികൂടി. മണലൂർ കാരമുക്ക് കൊള്ളന്നൂര് വീട്ടില് സിബിന് കെ വര്ഗീസി(33)നെയാണ് നെടുമ്പാശ്ശേരി വിമാനത്താവളത്തില് വച്ച് ഇന്സ്പെക്ടര് എസ്.എച്ച്.ഒ കെ.പി ശ്രീഹരിയുടെ നേതൃത്വത്തിലുള്ള പൊലീസ് സംഘം പിടികൂടിയത്. പൊലീസ് കേസ് റജിസ്റ്റര് ചെയ്ത് അന്വേഷണം നടത്തിവരവേ വിദേശത്തായിരുന്ന പ്രതി തിരികെ നാട്ടിലെത്തി തിരിച്ചു പോകുമ്പോഴാണു പിടിയിലാകുന്നത്. തലപ്പുഴ, പേര്യ സ്വദേശിയായ മധ്യവയസ്കന്റെയും ഇദ്ദേഹത്തിന്റെ സുഹൃത്തിന്റെയും പരാതിയുടെ അടിസ്ഥാനത്തിലാണ് നടപടി. 2023 ഓഗസ്റ്റിലാണ് സംഭവം. ജോലി വാഗ്ദാനം ചെയ്ത് തലപ്പുഴ, പേര്യ സ്വദേശിയില്നിന്ന് 2,50,622 രൂപയും ഇദ്ദേഹത്തിന്റെ സുഹൃത്തില്നിന്ന് 50,000 രൂപയും പല തവണകളായി സിബിന് കെ വര്ഗീസ് വാങ്ങിയെങ്കിലും ജോലി തരപ്പെടുത്തി കൊടുക്കുകയോ വാങ്ങിയ തുക തിരികെ നല്കുകയോ ചെയ്തില്ല എന്നായിരുന്നു പരാതി. തലപ്പുഴ സബ് ഇന്സ്പെക്ടര് എസ്.പി ഷിബു, അസി. സബ് ഇന്സ്പെക്ടര് ഷൈജു, സിവില് പൊലീസ് ഓഫിസറായ രാജേഷ് എന്നിവരും പ്രതിയെ അറസ്റ്റ് ചെയ്ത പൊലീസ് സംഘത്തിലുണ്ടായിരുന്നു.
