തൃശൂർ: പ്രണയം തകർന്ന വാർഷികത്തിൽ ഊതി വീർപ്പിച്ച ബലൂണുകളിൽ ഓർമകളെ കാറ്റിൽപറത്തി യുവാവ്. കുറ്റുമുക്ക് നെട്ടിശേരിയിലെ പാടത്തിന്റെ വശത്ത് യുവാവ് ഒറ്റയ്ക്ക് ഊതി നിറച്ചത് 666 ചുവന്ന ബലൂണുകളാണ്. കാരണം ചോദിച്ചവരോടുള്ള മറുപടി ഇങ്ങനെ: ‘ക്ടാവ് ബ്രേക്ക് അപ് ആയിപ്പോയിട്ട് 666 ദിവസമായി. ഇത്രയും ദിവസം കാത്തിരുന്നു. അതിന്റെ ഓർമയ്ക്കായിട്ട് അത്രയും ബലൂൺ ഇരിക്കട്ടേന്ന്’
പ്രണയം അവസാനിപ്പിച്ചു പോകുന്നവരെ വെടിവച്ചു കൊല്ലുന്ന ഇക്കാലത്ത് ചുവന്ന ഹൃദയം പോലുള്ള ബലൂണുകൾ ഉയർത്തി വികാരം പ്രകടിപ്പിച്ച യുവാവ് ഇതുകൂടി പറഞ്ഞു. ‘പോയ ക്ടാവ് സന്തോഷമായി ജീവിക്കട്ടെ. നല്ലതു വരട്ടെ.’ ഇന്നലെ രാവിലെയാണു ഒരു വലിയ പെട്ടി നിറയെ ബലൂൺ പൊതികളുമായി യുവാവ് നെട്ടിശേരി പാടവരമ്പിലെ റോഡിലെത്തിയത്. പോസ്റ്റിലും മരത്തിലുമായി കയർ വലിച്ചു കെട്ടി അതിലേക്ക് ബലൂണുകൾ ഓരോന്നായി ഊതി നിറച്ചു കെട്ടി.
666 ബലൂണുകൾ ഊതി നിറയ്ക്കാൻ മണിക്കൂറുകളെടുത്തു. ഊതി ഊതി അവശനായിട്ടും വിടാതെ എണ്ണം തികച്ചു. വഴിയേ പോയവരൊക്കെ കൗതുകം കൊണ്ടു ചോദിച്ചു. എല്ലാവരോടും പ്രണയം മുറിഞ്ഞു പോയ കഥ തന്നെ പറഞ്ഞു. ബലൂൺ കെട്ടിത്തീർന്നയുടൻ കക്ഷി സ്ഥലം വിടുകയും ചെയ്തു.
തേച്ചിട്ട് പോയ കാമുകിയുടെ ഓർമകളിൽ ‘666 ചുവപ്പൻ ഹൃദയ ബലൂണുകൾ’ ഊതി വീർപ്പിച്ച് കാറ്റിൽ പറത്തി വിട്ട് യുവാവിന്റെ വാർഷികാഘോഷം
