ഗുരുവായൂർ: ഗാന്ധിയനും സ്വാതന്ത്ര്യ സമര സേനാനിയുമായ വലിയ പുരക്കൽ കൃഷ്ണന്റെ ജന്മശതാബ്ദി ആഘോഷം ഏപ്രിൽ അഞ്ചിന് ഗുരുവായൂർ – പാവറട്ടി മേഖലയിലെ സാമൂഹ്യ സാംസ്ക്കാരിക സംഘടനകളുടെ നേതൃത്വത്തിൽ സംഘടിപ്പിക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. ഏപ്രിൽ 5 ന് രാവിലെ 11 ന് ഗുരുവായൂർ രുഗ്മണി റീജൻസിയിൽ നടക്കുന്ന അനുമോദന ചടങ്ങ് മുൻ നിയമസഭ സ്പീക്കർ വി.എം സുധീരൻ ഉദ്ഘാടനം ചെയ്യും. എൻ.കെ അക്ബർ എം.എൽ.എ ഉപഹാര സമർപ്പണം നടത്തും. നഗരസഭ ചെയർമാൻ എം കൃഷ്ണദാസ് പൊന്നാട അണിയിക്കും. ടി.എൻ പ്രതാപൻ പ്രശസ്തി പത്രം സമർപ്പിക്കും. സ്വാമി പ്രബോധ തീർത്ഥ ശിവ ഗിരി മഠം അനുഗൃഹ പ്രഭാഷണം നടത്തും. ചടങ്ങിൽ സാമൂഹ്യ-സാംസ്ക്കാരിക – രാഷ്ട്രീയ രംഗത്തെ പ്രമുഖർ പങ്കെടുക്കും. സ്വാതന്ത്ര്യ സമരത്തിന് നേതൃത്വം നൽകിയിരുന്ന ഇൻഡ്യൻ നാഷണൽ കോൺഗ്രസ്സിൻ്റെ സജീവ പ്രവർത്തകനായിരുന്ന കൃഷ്ണൻ സംഘടനയിൽ പാവറട്ടി വില്ലേജ് കോൺഗ്രസ്സ് സെക്രട്ടറി, മണ്ഡലം കോൺഗ്രസ്സ് സെക്രട്ടറി, ചാവക്കാട് ഫോർട്ട് കൊച്ചി മണ്ഡലം സെക്രട്ടറി, പൊന്നാനി ഡി സി സി അംഗം എന്നീ സ്ഥാനങ്ങൾ വഹിച്ചിരുന്നു. ശ്രീനാരായണ ഗുരുവിൻ്റെ ആദർശങ്ങളിൽ വിശ്വസിച്ച് എസ്എൻഡിപി പ്രസ്ഥാനങ്ങളിലും സജീവമായി പ്രവർത്തിച്ചിരുന്നു. ഗുരുവായൂരിൽ കെ കേളപ്പജി നയിച്ച ഗുരുവായൂർ ക്ഷേത്രപ്രവേശന ദിനാചരണത്തിൽ പങ്കെടുത്തിട്ടുണ്ട്. പ്രധാനമന്ത്രിയായിരുന്ന ജവഹർലാൽ നെഹ്റു പാവറട്ടി സെന്റ് ജോസഫ് സ് ഹൈസ്ക്കൂളിൽ പങ്കെടുത്ത യോഗത്തിലേക്ക് പ്രത്യേകം ക്ഷണിക്കപ്പെട്ടിരുന്നു. വിവിധ സാമൂഹ്യ സാംസ്ക്കാരിക വ്യാപാര സംഘടനകളുടെ ഭാരവാഹിത്വം വഹിച്ചു. ഈ അടുത്ത കാലം വരെ സൈക്കിളിൽ സഞ്ചരിച്ച് പൊതു പരിപാടികളിൽ പങ്കെടുത്തിരുന്ന കൃഷ്ണൻ ഡോക്ടറുടെ നിർദേശപ്രകാരം വിശ്രമജീവിതം നയിക്കുന്നു. ജീവിതത്തിൽ ഖാദി മാത്രം ഉപയോഗിക്കുന്ന വ്യക്തിയാണ്. ശതാബ്ദി ആഘോഷ കമ്മറ്റി ചെയർമാൻ ആർ. രവികുമാർ, വർക്കിംഗ് ചെയർമാൻ അരവിന്ദൻ പല്ലത്ത്, ജനറൽ കൺവീനർ ബാലൻ വാറണാട്ട്, ട്രഷറർ വി. കെ. ജയരാജ് എന്നിവർ വാർത്താസമ്മേളനത്തിൽ പങ്കെടുത്തു.
