രാമനാട്ടുകര: ഗുരുതരാവസ്ഥയിലുള്ള രോഗികളുമായി ആശുപത്രിയിലേക്ക് കുതിച്ച ആംബുലന്‍സുകള്‍ ഗതാഗതക്കുരുക്കില്‍ അകപ്പെട്ട് രണ്ട് രോഗികള്‍ മരിച്ചു. എടരിക്കോട് കളത്തിങ്കല്‍ വീട്ടില്‍ സുലൈഖ (54), വള്ളിക്കുന്ന് അരിയല്ലൂര്‍ കോട്ടാശ്ശേരി സ്വദേശി ഷജില്‍കുമാര്‍ (49) എന്നിവരുടെ ജീവനാണ് കഴിഞ്ഞദിവസം രാത്രി വഴിയില്‍ പൊലിഞ്ഞത്. നിര്‍മാണത്തിലിരിക്കുന്ന പുതിയ ആറുവരിപ്പാതയില്‍ കാക്കഞ്ചേരിഭാഗത്താണ് ആംബുലന്‍സുകള്‍ കുടുങ്ങിക്കിടന്നത്. ഇതേത്തുടര്‍ന്ന് രോഗികള്‍ക്ക് യഥാസമയം ചികിത്സനല്‍കാനായില്ല.
കോട്ടക്കല്‍ മിംസില്‍നിന്ന് സുലൈഖയുമായി വൈകീട്ട് 5.30-ന് കോഴിക്കോട് ഇഖ്റ ആശുപത്രിയിലേക്ക് പുറപ്പെട്ട തെഹല്‍ക്ക ഐ.സി.യു. ആംബുലന്‍സും ചേളാരി ഡി.എം.എസ്. ആശുപത്രിയില്‍നിന്ന് ഷജില്‍കുമാറുമായി കോഴിക്കോട് മെഡിക്കല്‍കോളേജിലേക്ക് പോവുകയായിരുന്ന സാപ്റ്റ്കോ ആംബുലന്‍സുമാണ് അനിശ്ചിതമായി ഗതാഗതക്കുരുക്കില്‍പ്പെട്ടത്. സമയം വൈകിയതോടെ ഇരു ആംബുലന്‍സുകളിലെയും രോഗികളെ ഫറോക്ക് ചുങ്കം ക്രസന്റ് ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.
ആംബുലന്‍സ് ഗതാഗതക്കുരുക്കില്‍പ്പെട്ടു; രണ്ട് രോഗികളുടെ ജീവന്‍ വഴിയില്‍ പൊലിഞ്ഞു
