ചേലക്കര: ചേലക്കര നിയോജകമണ്ഡലത്തിൽ വോട്ടിങ്ങ് പുരോഗമിക്കുന്നു. രാവിലെ മുതൽ തന്നെ ഒട്ടുമിക്ക പോളിംഗ് ബൂത്തുകളിലും വോട്ടർമാരുടെ നീണ്ട നിരയാണ്. എൽ.ഡി.എഫ് സ്ഥാനാർഥി യു.ആർ പ്രദീപ് കൊണ്ടയൂർ വിദ്യാസാഗർ ഗുരുകുലം സ്‌കൂളിൽ വോട്ട് ചെയ്തു. ചേലക്കരയിൽ വൻഭൂരിപക്ഷത്തിൽ എൽ.ഡി.എഫ് വിജയിക്കുമെന്ന് യു.ആർ പ്രദീപ് വോട്ട് രേഖപ്പെടുത്തിയ ശേഷം മാധ്യമങ്ങളോട് പ്രതികരിച്ചു. എൻഡിഎ സ്ഥാനാർത്ഥി കെ ബാലകൃഷ്ണൻ തിരുവില്വാമല പാമ്പാടി സ്കൂളിലായിരുന്നു വോട്ട് രേഖപ്പെടുത്തിയത്. വിജയം ഉറപ്പാണെന്നും ചേലക്കരയിലെ ജനങ്ങൾ മാറ്റം ആഗ്രഹിക്കുന്നുവെന്നും അദ്ദേഹം പറഞ്ഞു. മണ്ഡലത്തിലെ മുൻ എംഎൽഎയും നിലവിലെ എംപിയുമായ കെ. രാധാകൃഷ്ണൻ തോന്നൂർക്കരയിലെ ബൂത്ത് നമ്പർ 75ൽ പത്തുമണിക്ക് വോട്ട് രേഖപ്പെടുത്തും.
