ഗുരുവായൂർ: ശക്തമായ കാറ്റിൽ ഗുരുവായൂർ ക്ഷേത്ര പരിസരത്തെ കൂവളത്തിൻ്റെ കൊമ്പൊടിഞ്ഞു വീണു. യുവതിക്ക് പരിക്കേറ്റു. ഗുരുവായൂർ ക്ഷേത്രദർശനത്തിനെത്തിയ നോര്‍ത്ത് പറവൂര്‍ സ്വദേശി കണിയരിക്കല്‍ നിഖിലിന്റെ ഭാര്യ അനുമോള്‍(24)ക്കാണ് പരിക്കേറ്റത്. ഇന്ന് രാവിലെ 9 മണിയോടെയാണ് സംഭവം. ഇന്നലെ വൈകിട്ടാണ് ഇവര്‍ ഗുരുവായൂരിലെത്തിയത്. ഇന്ന് രാവിലെ ആറുമണിക്ക് ദര്‍ശനം കഴിഞ്ഞ് ലോഡ്ജിലേക്ക് തിരികെ പോയിരുന്നു. പ്രസാദം വാങ്ങിക്കാനായി വീണ്ടും എത്തിയ സമയത്താണ് ഗുരുവായൂർ ക്ഷേത്രത്തിൻ്റെ തെക്കേനടപന്തലിന് പടിഞ്ഞാറ് ഭാഗത്തെ കൂവളത്തിന്റെ വലിയ കൊമ്പ് ഒടിഞ്ഞു വീണത്. വലിയ കമ്പ് വീണ് തല പൊട്ടി. ഉടന്‍തന്നെ ഭക്തരും സെക്യൂരിറ്റി ജീവനക്കാരും ചേര്‍ന്ന് ഇവരെ ആംബുലന്‍സില്‍ ദേവസ്വം മെഡിക്കല്‍ സെന്ററില്‍ എത്തിച്ചു. യുവതിയുടെ തലക്ക് 9 തുന്നലുകൾ വേണ്ടി വന്നു.
