പാലക്കാട്: ലോക്ഡൗണിനിടെ, വാഹന പരിശോധനക്ക് പൊലീസിനൊപ്പം സംഘ്പരിവാർ സംഘടനയായ സേവാഭാരതി പ്രവർത്തകർ യൂണിഫോമിൽ റോഡിലിറങ്ങിയത് വിവാദമായതോടെ സേവാഭാരതി വോളൻറിയരുടെ സേവനം വേണ്ടെന്നുവെച്ചു.
ഇന്ന് രാവിലെ പാലക്കാട് നഗരത്തിനു സമീപം കാടാങ്കോട് ജംഗ്ഷനിലാണ് ആണ് സംഭവം. പൊലീസുകാരോടൊപ്പം സേവാഭാരതി വോളൻറിയർമാരും യാത്രക്കാരോട് യാത്രയുടെ ഉദ്ദേശം ചോദിച്ചറിയുന്നുണ്ടായിരുന്നു.
ഞായറാഴ്ചയും സേവഭാരതി പ്രവർത്തകർ പൊലീസിനെ സഹായിക്കാൻ എത്തിയിരുന്നെങ്കിലും യൂണിഫോം ധരിച്ചിരുന്നില്ല. തിങ്കളാഴ്ച സേവഭാരതി, പാലക്കാട് എന്നെഴുതിയ കുങ്കുമ നിറമുള്ള ടീ ഷർട്ടും കാക്കി പാൻറും ധരിച്ചാണ് വോളൻറിയർമാർ നിരത്തിലിറങ്ങിയത്. ഇവരിൽ ചിലർ കോവിഡ് പ്രോട്ടോകോൾ ലംഘിച്ച്, മാസ്ക് താഴ്ത്തി യാത്രക്കാരോട് സംസാരിക്കുന്നതായ ചിത്രങ്ങളും സോഷ്യൽമീഡിയ വഴി പുറത്തുവന്നിട്ടുണ്ട്. സംഭവം വിവാദമായതോടെയാണ് സേവാഭാരതി വോളൻറിയരുടെ സേവനം വേണ്ടെന്നുവെച്ചത്.
