കടപ്പുറം: കറുകമാട് എട്ടാം വാർഡിലെ വികസന മുരടിപ്പിനെതിരെ സി.പി.എം കറുകമാട് ബ്രാഞ്ച് കമ്മിറ്റിയുടെ നേതൃത്വത്തിൽ കറുകമാട് സെന്ററിൽ പ്രതിഷേധ ജ്വാല സമരം സംഘടിപ്പിച്ചു. സിപിഎം ഏരിയ കമ്മിറ്റി അംഗം എ.എച്ച് അക്ബർ ഉദ്ഘാടനം ചെയ്തു. ഇ.സി അർജ്ജുനൻ അദ്ധ്യക്ഷത വഹിച്ചു. ലോക്കൽ സെക്രട്ടറി കെ.വി അഷറഫ്, സി.കെ വേണു, പി പി കിരൺ എന്നിവർ സംസാരിച്ചു. ബ്രാഞ്ച് സെക്രട്ടറി ഷംസുദ്ദീൻ തൈവളപ്പിൽ സ്വാഗതം പറഞ്ഞു.
കറുകമാട് ബ്രാഞ്ച് ഓഫീസിന് മുന്നിൽ നിന്നും ആരംഭിച്ച പ്രകടനം കറുകമാട് സെന്ററിൽ സമാപിച്ചു. ലക്ഷങ്ങൾ ചിലവഴിച്ച് നിർമ്മിച്ച കറുകമാട് വാട്ടർ ടാങ്കിൽ നിന്നും കുടിവെള്ളം വിതരണം ചെയ്യുക, കറുകമാട് മേഖലയിലെ പഞ്ചായത്ത് റോഡുകൾ ഗതാഗത യോഗ്യമാക്കുക, വനിത ഫിറ്റ്നസ്സ് സെന്റർ പ്രവർത്തിപ്പിക്കുക എന്നീ
ആവശ്യങ്ങൾ ഉന്നയിച്ചായിരുന്നു സമരം.
