ചാവക്കാട്: യൂസർഫീ കളക്ഷൻ 100 ശതമാനം പൂർത്തീകരിച്ച് ജില്ലയിൽ ആദ്യമായി അഭിമാന നേട്ടം കൈവരിച്ച ചാവക്കാട് നഗരസഭയിലെ ഒമ്പതാം വാർഡിൽ ഹരിത ദീപോജ്ജ്വലനം സംഘടിപ്പിച്ചു. നഗരസഭ ചെയർപേഴ്സൺ ഷീജ പ്രശാന്ത് ഉദ്ഘാടനം ചെയ്തു. വാർഡ് കൗൺസിലർ കെ.വി സത്താർ അധ്യക്ഷത വഹിച്ചു. ചടങ്ങിൽ മുഴുവൻ ഹരിത കർമ്മ സേനാംഗങ്ങളെയും കുടുംബശ്രീ പ്രവർത്തകർക്കുള്ള ആദരവും വാർഡിലെ എല്ലാ കുടുംബങ്ങൾക്കുള്ള ഹരിത ഭവന സർട്ടിഫിക്കറ്റ് വിതരണവും ഉണ്ടായി. ക്ലീൻ സിറ്റി മാനേജർ ദിലീപ്, ഫിറോസ് പി തൈപ്പറമ്പിൽ, വൈശാഖ് എന്നിവർ സംസാരിച്ചു.
