ഗുരുവായൂർ: ചാവക്കാട് നഗരസഭയിലെ റോഡ് ഗുരുവായൂർ നഗരസഭയിലെ ഫണ്ട് ഉപയോഗിച്ച് ടാർ ചെയ്ത സംഭവത്തിൽ ഗുരുതരമായ കൃത്യവിലോപം നടത്തിയ ഗുരുവായൂർ നഗരസഭ ചെയർമാൻ തെറ്റ് സമ്മതിച്ച് മാപ്പ് പറയണമെന്നാവശ്യപ്പെട്ട് ഗുരുവായൂരിൽ കോൺഗ്രസ് പ്രതിഷേധം. ഗുരുവായൂർ മണ്ഡലം കോൺഗ്രസ്സ് കമ്മറ്റിയുടെ നേതൃത്വത്തിൽ നടന്ന പ്രതിഷേധ പരിപാടിയിൽ മണ്ഡലം പ്രസിഡന്റ് ഒ.കെ.ആർ മണികണ്ഠൻ അധ്യക്ഷത വഹിച്ചു. മണ്ഡലം നേതാക്കളായ ഒ.പി ജോൺസൺ, ശശി പട്ടത്താക്കിൽ, അനിൽകുമാർ ചിറക്കൽ, ശശി വല്ലാശ്ശേരി, എ.കെ ഷൈമിൽ , ബാബു സോമൻ, ബഷീർ കുന്നിക്കൽ, പ്രേമൻ മണ്ണുങ്ങൽ, സിൻ്റോ മാണിക്യത്ത്പടി, ശിവൻ ചിറ്റാട, രമ്യ കൈപ്പട എന്നിവർ സംസാരിച്ചു. ഗുരുവായൂരിൽ തന്നെ വിവിധ ഒട്ടനവധി പദ്ധതികൾക്ക് പണം കണ്ടെത്താൻ കഴിയാത്ത സാഹചര്യത്തിൽ ചാവക്കാട് നഗരസഭ റോഡ് ടാറിട്ട് കൊടുത്ത നിരുത്തരവാദപരമായ നടപടി അംഗീകരിക്കാൻ കഴിയില്ലെന്ന് പ്രതിഷേധക്കാർ പറഞ്ഞു.
