ചാവക്കാട്: തൃശൂർ ജില്ലയിൽ നിന്നും വ്യത്യസ്ത മേഖലയിൽ കഴിവ് തെളിയിച്ച കുട്ടികളെ തൃശൂർ ജില്ലാ ശിശു ക്ഷേമ സമിതി ആദരിച്ചു. മമ്മിയൂർ ലിറ്റിൽ ഫ്ലവർ ഇംഗ്ലീഷ് സ്കൂൾ മൂന്നാം ക്ലാസ്സ് വിദ്യാർത്ഥിനി ഹബീബ ആരിഫ് തൃശൂർ ജില്ലാ ശിശുക്ഷേമ സമിതിയുടെ ബാലപ്രതിഭാ പുരസ്കാരത്തിന് അർഹയായി. തൃശൂർ ടൗൺ ഹാളിൽ വെച്ച് നടന്ന ചടങ്ങിൽ കെ.എ.എസ് അസിസ്റ്റൻ്റ് ഡയറക്ടർ ആൻസൺ ജോസഫ് പുരസ്കാരം സമ്മാനിച്ചു. 49 സെക്കൻഡിൽ 28 സംസ്ഥാനങ്ങൾ, അവയുടെ തലസ്ഥാനം, ഭാഷ, എന്നിവ പറഞ്ഞു കൊണ്ട് ഇന്ത്യ ബുക്ക്‌ ഓഫ് റെക്കോർഡ്സിൽ ഈ മിടുക്കി ഇടം നേടിയിരുന്നു. ചാവക്കാട് ബ്ലാങ്ങാട് സ്വദേശി ആരിഫിൻ്റെയും എം.ഐ.സി ഇംഗ്ലീഷ് സ്കൂൾ അദ്ധ്യാപിക ഹസ്‌നയുടെയും മകളാണ് ഈ കൊച്ചു മിടുക്കി.
