തൃശൂർ: നെടുപുഴയിൽ യുവാവിനെ കുത്തി കൊലപ്പെടുത്താൻ ശ്രമിച്ച കേസിലെ പ്രതികൾ പിടിയിൽ. നെടുപുഴ കൊമ്പൻ ലൈൻ സ്വദേശി ചെമ്പൂരി വീട്ടിൽ സുബി എന്നു വിളിക്കുന്ന അരുൺ, കോടന്നൂർ ചാക്യാർകടവ് സ്വദേശി മേച്ചേരി വീട്ടിൽ അജിത്ത് എന്നിവരെയാണ് നെടുപുഴ പോലീസ് അറസ്റ്റ് ചെയ്തത്. നെടുപുഴ പളളിക്ക് സമീപം വെച്ചാണ് നെടുപുഴ സ്വദേശിയായ യുവാവിനെ പ്രതികൾ കുത്തി ഗുരുതരമായി പരിക്കേൽപ്പിച്ചത്. ഇക്കഴിഞ്ഞ ഒക്ടോബർ 30ന് വൈകീട്ട് ആയിരുന്നു സംഭവം. പരിക്കേറ്റ യുവാവിന്റെ പരാതിയുടെ അടിസ്ഥാനത്തിൽ കേസ് രജിസ്റ്റർ ചെയ്ത് നടത്തിയ അന്വേഷണത്തിലാണ് പ്രതികൾ പിടിയിലായത്. നെടുപുഴ ഇൻസ്പെക്ടറുടെ നേതൃത്വത്തിലുള്ള സംഘവും, തൃശ്ശൂർ സിറ്റി അസിസ്റ്റന്റ് പോലീസ് കമ്മീഷണറും സംയുക്തമായിട്ടായിരുന്നു അന്വേഷണം നടത്തിയത്. വൈദ്യ പരിശോധനയ്ക്ക് ശേഷം കോടതിയിൽ ഹാജരാക്കിയ പ്രതികളെ അറസ്റ്റ് ചെയ്തു.
