ഗുരുവായൂർ: പുതിയ കാർ, ഷോറൂമിൽനിന്ന് വാങ്ങിക്കൊണ്ടുവരുന്നതിനിടെ അപകടം. കാറിന്റെ മുൻവശം തകർന്നു. കാറോടിച്ചിരുന്ന യുവാവും കുടുംബവും അത്ഭുതകരമായി രക്ഷപ്പെട്ടു. തിങ്കളാഴ്ച വൈകീട്ട് നാലരയ്ക്ക് മമ്മിയൂർ സെന്ററിനടുത്തായിരുന്നു അപകടം. പാലക്കാട് വഞ്ചിക്കോട് സ്വദേശി ‘കൃഷ്ണഗാനത്തിൽ’ കൃഷ്ണകുമാറും ചെറിയ കുട്ടി ഉൾപ്പെടെ അഞ്ചുപേരടങ്ങുന്ന കുടുംബവുമായിരുന്നു കാറിലുണ്ടായിരുന്നത്.
ഇവർ കോയമ്പത്തൂരിൽനിന്നാണ് കാർ വാങ്ങിയത്. വാഹനപൂജയ്ക്കായി ഗുരുവായൂരിലേക്ക് വരുകയായിരുന്നു. മമ്മിയൂർ ക്ഷേത്രം എത്തുന്നതിനുമുമ്പ്, എതിരേ വന്ന മിനി ലോറിയുമായി കൂട്ടിയിടിക്കുകയായിരുന്നു. അപകടം റോഡിന്റെ മധ്യത്തിലായിരുന്നതിനാൽ ഒരു മണിക്കൂറോളം ഗതാഗതം തടസ്സപ്പെട്ടു.
