കുന്നംകുളം: ബൈക്കുമായി അഭ്യാസം നടത്തിയത് ചോദ്യം ചെയ്ത യുവാവിനെ തോക്കു ചൂണ്ടി ഭീഷണിപ്പെടുത്തിയ നാലംഗ സംഘത്തെ കുന്നംകുളം പോലീസ് അറസ്റ്റ് ചെയ്തു. ചങ്ങരംകുളം അയനിച്ചോട് കൊട്ടാരത്തു വളപ്പില്‍ 20 വയസുള്ള മുബഷിര്‍, അവയില്‍ തെക്കു വളപ്പില്‍ 22 വയസുള്ള മുഹമ്മദ് ബാസില്‍, ആലങ്കോട് കിഴിഞ്ഞാലില്‍ 18 വയസുള്ള ഷാബില്‍, പള്ളിക്കര മണ്ണാന്‍ പടി 20 വയസ്സുള്ള ഫവാസ് എന്നിവരാണ് അറസ്റ്റിലായത്. ക്രിസ്തുമസ് ദിനത്തില്‍ സ്രായിക്കടവില്‍ വിനോദ സഞ്ചാരത്തിനായി എത്തിയ നിരവധി ആളുകളുടെ ഇടയിലൂടെയാണ് ഇവർ അതിവേഗത്തിൽ ബൈക്കോടിച്ചത്. ഇത് ചോദ്യം ചെയ്തതോടെയാണ് സംഘം യുവാവിനെ തോക്കുചൂണ്ടി ഭീഷണിപ്പെടുത്തിയത്. സ്റ്റേഷന്‍ ഹൗസ് ഓഫീസര്‍ സൂരജിന്റെ നേതൃത്വത്തിൽ എസ്.ഐമാരായ ശ്രീജിത്, മണികണ്ഠന്‍, ബസന്ത്, എ.എസ്.ഐ വർഗീസ്, സിവില്‍ പോലീസ് ഓഫീസര്‍മാരായ ഹംദ്, അബ്ദുല്‍ റഷീദ്, സുജിത്കുമാര്‍, ഗംഗേഷ് എന്നിവരും പ്രതികളെ അറസ്റ്റ് ചെയ്ത സംഘത്തിലുണ്ടായിരുന്നു.
