കൊച്ചി: കോവിഡ് ലോക്ഡൗണിനെ തുടര്‍ന്ന് സുപ്പര്‍ സ്റ്റാറുകളായ മമ്മൂട്ടിയും മോഹന്‍ലാലുമടക്കമുള്ള താരങ്ങള്‍ സിനിമകള്‍ക്ക് അവധി നല്‍കി വീട്ടിലാണ്. മുന്‍ നിര സിനിമാ താരങ്ങള്‍ അവരുടെ ജീവിതത്തില്‍ ഏറ്റവും കൂടുതല്‍ സമയം കുടുംബത്തിനൊപ്പം ചെലവഴിച്ചിട്ടുണ്ടാവുക കൊറോണക്കാലത്തായിരിക്കും. മമ്മൂട്ടിയും കഴിഞ്ഞ ഏതാനും മാസങ്ങളായി വീടിന്റെ ഗേറ്റിന് പുറത്തുപോലും പോകാതെ സ്വയം ചലഞ്ച് ഏറ്റെടുത്തിരിക്കുകയാണ്.
വീട്ടിലാണെങ്കിലും തന്റെ ആരോഗ്യം സംരക്ഷിക്കുന്നതിനും ഫോട്ടോഗ്രഫിയിലുള്ള കമ്പം ഉപയോഗപ്പെടുത്തുന്നതിനും താരം സമയം കണ്ടെത്തുന്നുണ്ട്. ഇപ്പോള്‍ സമൂഹ മാധ്യമങ്ങളില്‍ തരംഗമായിരിക്കുന്നത് മമ്മൂട്ടിയുടെ വര്‍കൗട്ട് ചിത്രങ്ങളാണ്. വര്‍ക്ക് അറ്റ് ഹോം എന്ന അടിക്കുറിപ്പില്‍ അപ്ലോഡ് ചെയ്തിരിക്കുന്ന ചിത്രങ്ങള്‍ക്ക് ആരാധകരും സഹതാരങ്ങളും ഗംഭീരമെന്ന കമന്‍റുകളുമായി എത്തിയിട്ടുണ്ട്.
