ശ്രീശാന്ത് തുറന്നു പറയുന്നു; “എല്ലാവരും എന്നെ ഒറ്റപ്പെടുത്തി, ആ രണ്ടുപേരൊഴികെ”

ന്യൂഡൽഹി: 2013ൽ ഐ.പി.എല്ലിനിടെ ഒത്തുകളിച്ചെന്നാരോപിക്കപ്പെട്ട്​ വിവാദ നിഴലിലായ നാളുകളിൽ ഇന്ത്യൻ ടീമിലെ സഹതാരങ്ങളിൽ ഭൂരിഭാഗം പേരും താനുമായി അകന്നുനിൽക്കാനാണ്​ താൽപര്യം കാണിച്ചതെന്ന്​ മലയാളി പേസ്​ ബൗളർ എസ്​. ശ്രീശാന്ത്​. വീരേന്ദർ സെവാഗും വി.വി.എസ്​ ലക്ഷ്​മണുമാണ്​ തന്നെ അവഗണിക്കാതിരുന്ന താരങ്ങളെന്നും ‘ഇന്ത്യ ടുഡെ’ക്ക്​ നൽകിയ അഭിമുഖത്തിൽ ശ്രീശാന്ത്​ വെളിപ്പെടുത്തി. 
ഒത്തുകളി വിവാദത്തിൽ കുരുങ്ങി ഇന്ത്യൻ ക്രിക്കറ്റ്​ കൺട്രോൾ ബോർഡി​​ന്റെ ആജീവനാന്ത വിലക്ക്​ നേരിട്ടിരുന്നു ശ്രീശാന്ത്​. പിന്നീട്​  2019 ആഗസ്​റ്റിൽ ബി.സി.സി.ഐ ഓംബുഡ്​സ്​മാൻ ജസ്​റ്റിസ്​ ഡി.കെ. ജയിൻ വിലക്ക്​ ഏഴു വർഷമായി കുറക്കുകയായിരുന്നു. തുടർന്ന്​ കളിയിൽ തിരി​െച്ചാൻ കൊതിക്കു​ന്ന 37കാരൻ,  ഇന്ത്യക്കുവേണ്ടി വീണ്ടും പന്തെറിയണമെന്ന ആഗ്രഹത്തിലാണിപ്പോൾ. ​2011ലാണ്​ ശ്രീശാന്ത്​ അവസാനമായി ഇന്ത്യക്കുവേണ്ടി കളത്തിലിറങ്ങിയത്​.  ‘ഇപ്പോൾ ഞാൻ ഒരുപാട്​ കളിക്കാരുമായി സംസാരിക്കാറുണ്ട്​. സചിൻ ടെണ്ടുൽകറുമായി ട്വിറ്ററിൽ ഈയിടെ സംസാരിച്ചിരുന്നു. വീരുവും ഞാനും ഇടക്കിടെ സന്ദേശങ്ങളയക്കാറുണ്ട്​. ഗൗതം ഗംഭീറിനെ ഈയടുത്ത്​ കണ്ടിരുന്നു’ -ശ്രീശാന്ത്​ പറഞ്ഞു. ‘അന്ന്​ ഒ​ട്ടേറെ കളിക്കാർ എന്നെ ഒഴിവാക്കാറായിരുന്നു പതിവ്​. വീരുഭായിയും ലക്ഷ്​മൺ ഭായിയും മാത്രമാണ്​ എന്നോട്​ മിണ്ടിയിരുന്നത്​. പി​ന്നെ മറ്റു രണ്ടോ മൂന്നോ പേരും. എനിക്കെതിരെ കോടതി നടപടികൾ നടക്കുന്ന സമയമായതിനാൽ മിക്ക താരങ്ങളും എന്നെ അവഗണിക്കുന്നത്​ അവർക്കുള്ള ആശങ്ക കാരണമാണെന്ന്​ എനിക്ക്​ മനസ്സിലായിരുന്നു. ഞാൻ അവരോട്​ ഇടപഴകാനൊന്നും പോയതുമില്ല. പതിയെ കാര്യങ്ങൾ പുരോഗതി പ്രാപിച്ചു. കുറച്ചുനാൾ മുമ്പ്​ ഭാജ്ജു പാ (ഹർഭജൻ സിങ്​) യെ ഞാൻ എയർപോർട്ടിൽവെച്ച്​ കണ്ടിരുന്നു. ഞാൻ ക്രിക്കറ്റ്​ വീണ്ടും കളിക്കാൻ തുടങ്ങുമ്പോൾ ‘ഭാജി സ്​പോർട്​സ്​’ നിർമിച്ച ബാറ്റ്​ ഉപയോഗിക്കുമെന്ന്​ ഞാൻ അദ്ദേഹത്തോട്​ പറഞ്ഞു.’  ഇന്ത്യക്കുവേണ്ടി വീണ്ടും കളിക്കാനുള്ള ആഗ്രഹം 37ാം വയസ്സിലും ശ്രീശാന്ത്​ മറച്ചുവെക്കുന്നില്ല. ‘എന്നെങ്കിലുമൊരിക്കൽ  ഇന്ത്യക്കുവേണ്ടി വീണ്ടും കളിക്കാൻ കഴിയുമെന്നാണ്​ എ​​ന്റെ പ്രതീക്ഷ. ലോക ടെസ്​റ്റ്​ ചാമ്പ്യൻഷിപ്പ്​ എന്നെ പ്രചോദിപ്പിക്കുന്നുണ്ട്​. അതിൽ കളിക്കുകയാണ്​ ലക്ഷ്യം. കേരള ടീമിലെത്തുകയാണ്​ പ്രാഥമികമായി ഞാൻ ഉന്നമിടുന്നത്​. അവിടെ മികച്ച പ്രകടനം കാഴ്​ചവെക്കാനാകുമെന്ന്​ പ്രത്യാശിക്കുന്നു. ഇന്ത്യൻ ടീമിൽ തിരികെയെത്താൻ വേണ്ട​ മികവിലേക്ക്​ പന്തെറിയാൻ കഴിയുമെന്നും അതുവഴി വീണ്ടും ആ ജഴ്​സിയണിയാൻ കഴിയുമെന്നുമുള്ള ചിന്തകളിലാണിപ്പോൾ.’- ശ്രീശാന്ത്​ വ്യക്​തമാക്കി.